我來日本已經2年多了。第一年是自己住，第二年開始多了一個不得了的room mate。
首先略略解釋一下我們家的環境。基本上係典型的日式間隔，一入門口有個玄関，右邊係浴室同埋廁所，2者分開，左邊係一個開放式蚊型廚房。直行開門就係房，有個閣樓。由於窮困的關係，我地係無獨立房的，不過有共識，夠用而大家又comfortable就無問題。
記得我地有打算係日本一齊住的時候，大家都好明白「相見好，同住難」呢個道理，更何況熟悉我地的朋友仔都知道本身我地之間的相處有幾咁funny同唔要得，所以為左我地之間的友誼，曾經有傾過尼個「約法三章」，唔好反面。最後我只記得我話鬧交個陣唔好扔我落街。
我經常形容我room mate為他媽哥治，因為佢熱，肚餓，唔夠訓，比蚊攻擊就會燥底，好燥底，爆燥底。例如好熱時佢會重覆講3次，「好熱，好熱，真係好熱」，咁就要儘快處理一下。又有時佢條忍耐bar爆左，眼神瞬間變銳利/無神/放空時，你就知道，他媽哥治有d唔對路，要注意一下。
會唔會嗌交？唔會啦。你一句我一句，有來有往叫嗌交，係嗌交方面我係零戰鬥力，連普通串2句咀我都係完敗，加上不嬲都係我激嬲人多，所以我地無嗌交啦。另外，我個人又好麻煩，激嬲左人之後會好緊張，好不安，好想對方快d消左道氣。問題來了，男女朋友（其實應該話女朋友）就話可以哄啫，大家room mate又識左咁多年又2個女人，歉又道左，哄咩鬼野，哄都哄唔落啦。所以唯有學room mate話齋：「無架啦，時間會沖淡一切」。
不過呢，衷心覺得有個頂得自己順的room mate真係好難得，又聰明又轉數快又細心，又愈尼愈煮得一手好菜。放左工番屋企而我仲OT時又會煮埋飯同第二日便當。得閒又會講埋d長洲鄉音搞下gag。病左又會買埋藥兇我食藥或者睇醫生。上年有排無心情無胃口食飯時又好擔心好似阿媽咁鏟我鏟到上天花板再落地底咁叫我食野。
作為朋友，真係覺得只要佢健健康康，肥肥白白，開開心心，食得好訓得飽，體驗到想試的生活和工作，入到間好公司，幸幸福福咁就好替佢高興。
多謝你無扔我落街。
