share room這回事 (一)

話說今個星期係日本既黃金週，對於無得放紅假既我黎講意義不大。趁唔要得的room mate番左香港，講下關於以前share room/house既野。(其實佢番唔番香港都會照講)

到宜家為止，自己只有試過3次同家人以外既人生活。

第1次
剛剛到澳洲時，先住係好好既馬來西亞人home stay。

我，一個陌生人，突然加入人地既家庭。自己每日都尷尷尬尬咁，唔係好自然，唔係好習慣。特別係覺得每日都要同一個唔係自己阿媽既人報告行蹤，總會覺得有d奇怪。

第2次
離開home stay，同同學一齊share room。

當時我地2個租既房係有閣樓的，基本上一樓係用尼hea，食野同埋砌essay。而閣樓係一個寬敞既空間﹐放左2張床。

同當時的room mate一齊相處，都有好多新發現。例如佢係佛教徒，會有唸經時間。初時我咩都唔知，發現佢完全靜止咁大半個鐘，以為佢砌砌下essay訓左。於是我拍一拍佢，佢無反應，再望真d原來佢唸緊經。另外，佢係上海人，有時同家人會用上海話講電話。有時聽聽下會覺得自己好似聽得明，當然事實上係唔明。

有時明明2個都好忙咁砌緊essay，唔知邊個開始無啦啦講起d無聊野，講講下會再進化到講低能野。然後2個幾鐘過後，份essay就係寫多左一句咁多多。

至於點樣稱呼對方，基本上大部份時間我都係叫佢個英文名，有時叫下花名。不過......我個room mate 99%時間都係叫我個花名，就連有一次佢媽媽尼澳洲旅行，佢都係介紹我個花名比佢媽媽。

有時聽到其他朋友講下自己d room mate，我都會覺得大學遇到呢個夾得尼既room mate真係好好。

第3次
就係而家呢個識左好耐，去左x次旅行，好唔要得個位。咳咳!

嘿嘿，我決定留番下次再講。